У Гродзенскім медуніверсітэце прайшла дыялогавая пляцоўка са старшынёй аблвыканкама Уладзімірам Сцяпанавічам Каранікам

Дыялогавая пляцоўка "Медыцына будучыні: перспектывы развіцця аховы здароўя" адбылася ў Гродзенскім дзяржаўным медыцынскім універсітэце. Сустрэча з пяцікурснікамі ГрДМУ прайшла ў фармаце адкрытага дыялога.

– У вас, студэнтаў пятага курса, ёсць пэўныя пытанні: які шлях у медыцыне выбраць, як далей спецыялізавацца і дзе знайсці будучае месца працы, - адзначыў у пачатку сустрэчы старшыня аблвыканкама Уладзімір Сцяпанавіч Каранік, - у сістэме аховы здароўя для краіны ў цэлым, так і Гродзенскай вобласці ў прыватнасці працягваецца развіццё апорных клінік. Асноўны ўпор будзе зроблены на даступнасці медыцынскай дапамогі, захаванні правіла "залатой гадзіны". У ідэале, сітуацыя павінна развівацца так, што дзе б не пражываў наш грамадзянін, у выпадку экстранай сітуацыі ён павінен атрымаць дапамогу ў адпаведнасці з адзінымі стандартамі. Мы павінны забяспечыць, каб пацыент быў дастаўлены на працягу гадзіны ў тую клініку, якая мае ўсё неабходнае для аказання спецыялізаванай дапамогі.

Як падкрэсліў Уладзімір Сцяпанавіч, гэта тое, да чаго мы павінны імкнуцца. Таксама старшыня аблвыканкама адзначыў, што акцэнт і надалей будзе зроблены на практыка-арыентаваную падрыхтоўку студэнтаў.

– У планах у Гродзенскай вобласці працягваць мадэрнізацыю і ўдасканаленне аб'ектаў сістэмы аховы здароўя. Актыўна праектуецца новая бальніца, якая будзе будавацца ў Гродне насупраць 4 бальніцы. Яна будзе адпавядаць сучасным патрабаванням і нарматывам. Таксама актыўна праводзіцца рэканструкцыя хірургічнага корпуса ўніверсітэцкай клінікі, дзе будзе павялічана магчымасць па аказанні спецыялізаванай дапамогі, - распавёў Уладзімір Сцяпанавіч. – Што да анкадыспансера, спадзяемся, што радыелагічны корпус будзе ўведзены ў работу ў першым квартале 2023 года, будаўнічая гатоўнасць практычна поўная, цяпер чакаецца пастаўка сучаснага абсталявання. Ужо зманціраваны лінейныя паскаральнікі, - гэта амаль адны з самых сучасных, якія ёсць у нашай краіне. Практычна з нуля мы будзем ствараць радыёлагічную службу нашай вобласці, таму ў вас, студэнтаў, ёсць магчымасць абраць шлях радыяцыйнага анколага. Гэта цікавая спецыяльнасць, а апараты дазваляюць праводзіць радыехірургічныя методыкі і самую складаную прамянёвую тэрапію.

Падчас размовы старшыня аблвыканкама зазначыў, што актыўна развіваецца і медыцына ў рэгіёнах. Астравецкая ЦРБ - сучасны, добра аснашчаны міжраённы цэнтр. Дастаткова сур'ёзная ўвага надаецца Лідскай бальніцы. Тут, напрыклад, праектуецца новы тэрапеўтычны корпус.

Спектр пытанняў, які абмяркоўваецца далей падчас дыялогавай пляцоўкі, быў разнастайны. Студэнтаў-пяцікурснікаў цікавілі тэмы, якія датычацца будучай работы, выбару спецыялізацыі і іншыя.

– Урачы якіх спецыяльнасцей больш запатрабаваны ў сістэме аховы здароўя на дадзены момант?

– Калі браць найбольш запатрабаваныя, то, вядома, гэта ўрачы агульнай практыкі, - сказаў, адказваючы на пытанне, старшыня аблвыканкама. - У любым выпадку, вакансіі па хірургічным профілі, дыягнастычнаму ў вобласці ёсць. Галоўнае, каб вашае жаданне супала з нашымі магчымасцямі. Вы ведаеце патрабаванні Міністэрства аховы здароўя: для таго, каб размеркавацца ў стацыянар і па пэўнай спецыяльнасці, трэба мець пэўны сярэдні бал, - гэта па-першае, а па-другое, каб лакацыя вакансіі супала з вашым жаданнем ехаць у той рэгіён, дзе яна ёсць.

Уладзімір Сцяпанавіч адзначыў, што ў Гродзенскім медыцынскім універсітэце створаны ўсе ўмовы, каб атрымаць якасную адукацыю. Прафесарска-выкладчыцкі склад Alma Mater славіцца сваім высокім узроўнем падрыхтоўкі кадраў, таму кожны студэнт знойдзе той профіль, які яму бліжэй.

Дарэчы, такія сустрэчы ў фармаце адкрытага дыялога ў Гродзенскім медыцынскім універсітэце ўжо сталі традыцыйнымі. Як адзначаюць самі студэнты, такія мерапрыемствы даюць магчымасць наўпрост мець зносіны з кіраўніцтвам вобласці, дзе можна задаць свае пытанні, узняць хвалюючыя тэмы і атрымаць на іх кампетэнтныя адказы.

Фота: Таццяна Вялёнда