ГОСЦІ З БАРЫСАВА

Вучоба ў медыцынскім універсітэце - гэта не толькі штодзённыя аўдыторныя заняткі. Жыццё студэнта разнастайнае і цікавае, галоўнае - рацыянальна выкарыстоўваць час.

Менавіта гэтыя думкі былі выказаны абітурыентамі з Барысава, якія ў складзе пяцідзесяці чалавек прыехалі ў ГрДМУ ў рамках прафарыентацыйнай работы. Адным з этапаў іх знаёмства з універсітэтам стала наведванне музея беларускай этнаграфіі, што створаны на кафедры рускай і беларускай моў.

Школьнікі з цікавасцю пазнаёміліся з экспазіцыяй музея, даведаліся пра валанцёрскі цэнтр “Cardis”, члены якога  ўдзельнічалі ў стварэнні дадзенага музея, пра літаратурны клуб “Катарсіс”, чые пасяджэнні адбываюцца ў гэтым жа памяшканні. Таксама госці змаглі сфатаграфавацца на памяць на фоне розных экспанатаў музея. Было прыемна пачуць словы ўдзячнасці за арганізаваную экскурсію.